مقدمة ومحتويات العلبة تعالى جايب لك موبايل جامد بمعالج قوي وحش في الألعاب، الانفينكس جي تي 50 برو (Infinix GT 50 Pro) اللي انفينكس أبدعت فيه بصراحة. حطت كل حاجة عندها: معالج قوي في الألعاب، تبريد مائي لأول مرة في فئته، أزرار إضافية (تريجرز) على فريم الموبايل، وكمان مروحة تبريد. الموبايل ده يعتبر حلم من أحلام أي جيمر. خليني في فيديو النهارده أنقلك تجربتي مع الموبايل وأقولك مميزاته وعيوبه، وهل الموبايل ده يستاهل إنك تشتريه؟ أصله مش رخيص خالص سعره عالي شوية، وأقولك برده موقفه بالنسبة للموبايلات المنافسة، وهو أصلاً ليه موبايل منافس فين الموبايلات الجيمنج المتوفرة بضمان محلي في مصر؟ فأنا عاوزك تتحمس معايا كده ونفجر الفيديو ده لايكات، وأكيد ما تنسوش دعواتكم لإخواتنا بالفرج القريب، ويلا بينا نبدأ المراجعة. الموبايل ده بيجي بباكدج حلو قوي، علبة كبيرة جواها علبتين: علبة الموبايل اللي جواها طبعاً الموبايل والشاحن ووصلة الشحن وجراب وسماعات سلك تايب سي كمان، وفي علبة تانية بقى منفصلة دي جواها مروحة التبريد ووصلة من تايب سي لتايب سي.
الأداء ونظام التبريد المائي الثوري وأكيد هنبدأ بتجربة الأداء والجيمنج. الموبايل ده جاي بمعالج قوي من ميديا تك اسمه "دايمنستي 8400 التيميت"، تكنولوجيا 4 نانو، مع ذاكرة تخزين صاروخية "UFS 4.1"، مع أحدث واجهة لانفينكس المبنية على أندرويد 16 مع وعد بثلاث سنين تحديثات أندرويد. المعالج ده مش جديد علينا، جربناه قبل كده في البوكو اكس 7 برو وفي الشاومي 15 تي. أنا شخصياً جربت المعالج ده في الموبايلين دول، وهو معالج قوي جداً ونشيط جداً وممتاز في الألعاب، بس مشكلته عدم الاستقرار بعد فترة من الضغط عليه بسبب السخونة، المعالج بيقلل الترددات بتاعته علشان السخونة الأوفر. تقوم انفينكس بقى تعالج القصة دي بنظام تبريد سائل اسمه "هيدرو فلو ليكويد كولينج" (Hydro flow liquid cooling)، وده عبارة عن مضخة حقيقية موجودة في جسم الموبايل. هتشوف السائل بعينك جوه المواسير في الجزء الشفاف اللي باين في ظهر الموبايل من تحت. هي طبعاً المواسير مش هنا بس، المواسير طالعة لحد فوق الحتة اللي فيها المعالج.
أنا ما كنتش مصدق إن الموبايل ده فيه مضخة بجد، بس حرفياً هو فيه مضخة هتسمعها لما تحط الموبايل كده على ودنك من الجزء ده، الجزء ده هو اللي فيه المضخة. تسمع صوت، عارف إنت الراديو؟ شوشرة الراديو بتاعة زمان دي، بس واطي قوي على فوليوم واحد يعني، كده أنا مش سامع حاجة، كده مش سامع حاجة، كده وأنا لازق ودني حرفياً في الموبايل بأكني بتكلم في الموبايل بس بالعكس يعني، سامع صوت المضخة بتاعة التبريد. وبرده عشان لو اشتريت الموبايل ما تقلقش، في زنة خفيفة قوي هتحس بيها والمضخة شغالة على أقصى سرعة ليها على ظهر الموبايل برده من عند الحتة بتاعة المضخة، بس دي يعني تكاد تكون مش محسوسة، بس أنا عشان عاوز أنقلك التجربة كاملة عشان لو حد اشترى ما يفتكرش إن في حاجة أو في قصة في الموبايل.
تفاصيل نظام التبريد والاختبارات أنا ماعرفش اعتمادية التبريد ده كعمر افتراضي قصتها عاملة إيه بصراحة، دي أول مرة أجرب موبايل بالقصة دي. أنا عارف إن نظام التبريد ده مش انفينكس هي أول حد يعمله، في شركات تانية هي اللي عاملاه، بس أنا ده أول موبايل أجربه في مصر ضمان محلي في نظام التبريد المائي ده. وكمان السوفت وير نفسه فيه شوية حركات حلوة بقى في نظام الليكويد كولينج ده؛ يعني فيه إن إنت تقفله وتفتحه في تلات سرعات للمضخة: السمارت والنورمال والرابد. أنا في معظم الأوقات كنت مشغلها على رابد أو سمارت. وفي بقى شوية حاجات زي ساوند إيفيكتس كده وفايبريشن، اسمع كده... الموبايل بيعمل صوت الماية وهي ماشية في المواسير وبيدي سنة فايبريشن، وفيه إن هو يشتغل أوتوماتيك أول ما توصله على الشحن. وهتشوف بقى يعني أنا فضلت حبة، حبة كتير قاعد كل أما بمسك الموبايل ده قاعد أتفرج على الماية وهي ماشية جوه المواسير، لما أقفل الموبايل كده ألاقي الماية بتنزل تركن تحت يا باشا، تقعد تتفرج عليها وهي بقى إيه بتنزل، وأول ما تركن تحت خالص بقعد بقى أعمل حاجة غبية جداً، بقعد أميل كده الموبايل وأشوف الماية وهي بتتحرك يمين وشمال. كان في لعبة زمان زمان وأنا صغير قوي كان فيها الحوار ده، فيها حوار فقع الماية دي بس مش حد يفكرني كده باسمها. المهم نرجع بقى للجد، برامج الاختبارات كلها اللي بعملها على الموبايلات هنا ما قدرتش أشوف مع نظام التبريد ومن غير نظام التبريد، لأن أوتوماتيك السوفت وير بيشغل نظام التبريد على أقصى حاجة في أي برامج اختبارات علشان ناخد أعلى بنش ماركس أو أرقام منه، وكده كده الأرقام بتاعته كويسة جداً.
واجهة المستخدم وتجربة الألعاب الاحترافية تجربة الموبايل جوه السوفت وير، يعني الواجهة وكده فإحنا معانا تجربة كويسة جداً زي الفل، يعني يا جماعة انفينكس بتحاول تغير من جلدها. السوفت وير أنا مش شايف فيه أي أزمة إطلاقاً على استخدامي، ممكن أنت استخدامك تحس بأزمة، بس يعني أنا شايف من أول النوت 50 اس والنوت 60 والنوت 60 برو أو النوت 50 اس والنوت 60 بس هم دول اللي أنا بنصح بيهم يعني، تجربة السوفت وير كويسة جداً، وتخيل هنا إن أنت معاك معالج أسرع فتجربة السوفت وير أساساً أسرع. بس إحنا بقى جايين نتكلم عن تجربة الألعاب: ببجي بتشتغل هنا على 120 فريم والتجربة بتكون كويسة جداً جداً، ناعمة جداً جداً، الموبايل يوم ما يعمل دروب ينزل 10 فريم ويطلع تاني لل 120 فريم، يا جماعة دي حاجة ممتازة جداً إن إحنا نلاقيها في موبايل ضمان محلي. وكول أوف ديوتي بقى المفاجأة إن هي بتشتغل بشكل رسمي على 144 فريم، لأن انفينكس عاملة كولابريشن أو تعاون مع بعض الألعاب زي كول أوف ديوتي، فهتلاقي الموبايل ده بيشغلهالك على 144 فريم وهتلاقي تجربة اللعبة ناعمة ومستقرة وحلوة جداً جداً. أنا مش مصدق إن أنا بشكر في تجربة ألعاب تقيلة على موبايل انفينكس، الدنيا فعلاً بتتغير. التريجرز (الأزرار الجانبية) بقى اللي على فريم الموبايل دي مش طبيعية، رهيبة جداً هتساعدك طبعاً في تجربة الألعاب، هتخليك أسرع تعرف تعمل كلات أكتر والكلام ده كله. أنا مش جيمر قوي يعني، أنا ما بحبش الألعاب، بلعب بس عشان أجربلكم الألعاب على الموبايلات، إنما أنا على موبايلي مش بلعب حاجة. والموبايل ده على فكرة مش موجه لكل الناس هو موجه لمهاويس الألعاب فقط، عشان ما تبقاش إنت مستخدم عادي وتروح تجيب الموبايل ده. المهم إن التريجرز دي كويسة جداً وبتعمل هابتك فيدباك (اهتزاز تفاعلي) كده لما تدوس عليها، وسريعة، سريعة جداً فعلاً. وكمان الجديد إن هي بقى فيها إن إنت تعمل سوايب، يعني أنا خليت مثلاً إن هنا لما آجي أعمل سوايب كده أغير السلاح وأنا بلعب ودي حاجة جامدة جداً ما بلاقيهاش أنا يا باشا الكلام ده خالص في أي موبايل تاني. وعلى فكرة ممكن تستخدم التريجرز دي بقى في الواجهة تعمل بيها حاجات اختصارات في الواجهة، ما هي زراير يا باشا موجودة معاك، فالدنيا حلوة قوي في الموبايل ده كسوفت وير وهارد وير وألعاب وكل حاجة الدنيا تمام جداً.
الحرارة، المروحة، واستقرار الأداء واللي مساعد طبعاً النظام إن هو يشغل كل حاجة بكفاءة هو نظام التبريد اللي انفينكس اجتهدت فيه. بس اوعى تفتكر إن الموبايل ده هيكون ظهره ساقع بقى، ما هو عليه ماية عشان بس الاشتغالات بتاعة الحاجات دي! لا يا باشا الموبايل بيدفى عادي جداً زيه زي أي موبايل بدون أي مشاكل، بس الفكرة إن هو مش بيولع نار، وفي نفس الوقت هتقدر إن إنت تاخد ستبيلتي أعلى من المعالج فترة أطول، وفي نفس الوقت لما تبطل الحاجة اللي أنت بتعملها تقيلة دي هتلاقي الموبايل برد معاك بسرعة. أعلى استقرار لقيته في أقوى اختبار بعمله على 3 دي مارك كان 74% على أقصى حاجة وده رقم مش وحش، وبص كده على الكيرف بتاع الاستبيلتي بتاع الاختبار اللي هو "الوايلد لايف اكستريم ستريس تست"، ماشي سموذ، ما فيش بقى الطلعات والنازلات، لا الدنيا فيه بتبقى سموث جداً جداً. درجة الحرارة وصلت 48، أنا بقولك هو بيسخن بس لا، هتعرف حتى مع السخونة دي إن إنت تكمل لعب عليه. ونروح بقى للمروحة، المروحة يا باشا بتركب على الجراب اللي هو ماسك نفسه شوية، مش جراب سيليكون اللي جاي مع الموبايل. هنركب كده الجراب ونركب المروحة، بص المروحة بتركب ماجنت (مغناطيس) وعلى فكرة يعني ماسكة ماسكة جامد جداً ما فيهاش أي مشكلة بتمسك جامد. طبعاً هي مش هينفع تلزق دايركت على ظهر الموبايل لأن ظهر الموبايل ما فيهوش ماجنت، فطبيعي لازم تركب الجراب عشان دي تلزق. نيجي بقى لطريقة تشغيل المروحة عندنا طريقتين، في طريقة عبثية وفي طريقة منطقية: الطريقة العبثية إن إنت بتعمل كده وتوصلها بالموبايل نفسه، اشتغلت أهي الار جي بي شغال والمروحة شغالة، بس طبعاً مش هيشحن، هيشحن إزاي يعني ما أنا مديله باور من الموبايل. الطريقة التانية اللي مش عبثية ومنطقية طبعاً إن إنت توصله بأي شاحن عندك يكون 30 واط فيما فوق، فهتلاقي الموبايل بيشحن وايرلس لما توصله، وفي نفس الوقت مروحة التبريد شغالة. في زرار هنا كده في المروحة، الزرار ده فيه إن إنت تقفل الشحن بس، قفل أهو، دوس هتقفل الشحن، دوس هتفتح الشحن، ما فيش إن إنت تتحكم في سرعات أو سرعة المروحة هي سرعة واحدة. مش عارف هتسمعوها ولا لأ بس صوتها مش قليل صوتها مسموع شوية. المروحة والار جي بي بتاعها شيك جداً وبتشحن وايرلس فالدنيا تمام قوي.
فعالية التبريد ومقارنات مع الإصدار السابق بس أنا عاوز أفهمك بقى قصة التبريد بتاعة المروحة دي، بص يا باشا أنت عشان تركب المروحة زي ما اتفقنا إن إحنا ركبنا جراب، والجراب ده بيكتم الحرارة جوه الموبايل شوية، فالمروحة لما بتيجي تركب على الجراب ده وتبرد، ففي النهاية النتيجة بتبقى واحدة من غير الجراب والمروحة، يعني من غير الجراب بالتبريد المائي بس تقريباً نفس النتيجة اللي خدتها وأنا مشغل التبريد المائي وحاطط الجراب وحاطط المروحة. ممكن يكون دور المروحة هنا الأكثر فاعلية إن لما آجي أعوز ألعب فترة طويلة وفي نفس الوقت أحط الموبايل يتشحن فأحطه على الدوك ده أو الوايرلس تشارجر ده وآخد شوية هوا يسقعلي شوية الموبايل عشان أقدر ألعب فترة طويلة جداً من غير ما الموبايل يولع مني نار وهو بيشحن، وممكن طبعاً تعمل باي باس تشارجن (Bypass Charging) وتعدي أصلاً إن البطارية تشحن وتاخد كهربا دايركت على طول من الوايرلس تشارجر، فهو ده وظيفته أكتر من كونه بيبرد. وعلى فكرة لما تيجي تشيله هتلاقي الحتة دي بتسقع حرفياً يعني دلوقتي تلجت، درجة حرارة تقريباً أقل من 10 في ثواني، بس هي زي ما قلتلك مش مؤثرة قوي في تبريد الموبايل، أو يمكن تفرق بقى مع الحر الشديد لو أنت هتلعب لعب بقى بره مثلاً من غير مروحة أو من غير تكييف أو أي حاجة ساعتها فعلاً ممكن المروحة دي تنقذك شوية، فإن هي مع التبريد المائي المكس ده يحاول يحافظ على استقرار الموبايل فترة طويلة بفريمات ثابتة. طيب أنا مش معايا بقى الانفينكس جي تي 30 برو القديم عشان أقولك فرق تجربة الأداء ما بين الاتنين، عشان بس تكون عارف كأرقام على ورق، فرق المعالج ما بين الـ 30 القديم والـ 50 الجديد فرق مش كبير قوي، هو يعتبر الفرق في نظام التبريد. التبريد المائي التاني اللي هو القديم الـ 30 برو، تقدر تلعب كويس وأنت مركب المروحة هو التانية برده كان معاه نفسها في المروحة، هنا تعرف تلعب كويس من غير المروحة علشان نظام التبريد المائي، فهو من الآخر كده ده يعتبر الفرق الميجور (الأساسي) اللي ما بينهم وده طبعاً جيل جديد والتاني جيل قديم والكلام ده كله. باشا عاوز توفر وتجيب ال 30 برو القديم تمام لو لقيته جديد براحتك، عاوز تزود وتجيب ال 50 برو تمام برده، وفي بديل تاني هقولهولك بس هو دولي في آخر الفيديو.
البطارية، الشحن والشاشة بطارية الموبايل هنا 6150 ملي أمبير وأحب أشكر جداً انفينكس على البطاريات اللي هي بتحطها الفترة الأخيرة، بطاريات رقمها مش كبير قوي مش 7000 و8000 بس أدائها الفعلي كويس، هنا أداء البطارية معقول على المعالج القوي اللي بيسحب طاقة كتير لأن أنت هتلعب عليه يعني، يكمل تقريباً قرب اليوم استخدام متوسط، وده مش أقوى بطارية في الفئة المتوسطة العليا علشان نكون على نور كده، بس إنت هتلعب فالدنيا تمام. الشحن الوايرلس 30 وات ما عنديش مشكلة فيه، الشحن السلكي 45 وات بس الموبايل بيشحن تقريباً بالكامل في ساعة وكام دقيقة وأنا مستغرب يعني يا انفينكس إنت عندك في النوت 60 برو شاحن 90 وات يعني تعرفي تعملي شاحن 90 وات، ما تحطيه في الموبايل ده، هو يعني الموبايل ده كخة ما تحطي يا ستي 90 وات! شاشة الموبايل كويسة 6.78 بوصة أمولد 1.5 كي 144 هيرتز، شاشة مسطحة بحواف يعتبر معقولة مش أقل حواف طبعاً في الفئة المتوسطة العليا بس حواف ما تضايقكش وتجربة الألوان على فكرة برده ما تضايقكش، كويسة تقضي الغرض بتاعها اللي هو أنت جايبه عشان تلعب، فهي مش هتخلي فيه أي أزمة في تجربة اللعب على الموبايل عشان هي طبعاً 144 هيرتز، وعلى فكرة أبليكيشن الفيسبوك شغال يا جماعة على الموبايل ده 144 هيرتز ممكن تكبره إن هو يشتغل 144 هرتز، وكول أوف ديوتي اشتغل 144 هيرتز فتمام والله يعني في حاجات أهي بتشتغل 144 هيرتز. معدل الفليكرينج معقول 2304 والسطوع تحت الشمس على فكرة كويس بنتكلم في فعلي قرب 1600 لحد 1800 نتس وبرده دي أرقام هتخلي شاشة الموبايل متشافة بدون أي مشكلة، وفي حماية جوريلا 7 إي على الشاشة، فآه هي من الآخر مش أحسن شاشة في الفئة المتوسطة العليا تماماً، اوعى تفتكر إن أنا بقولك كده، بس هي شاشة تمشي الدنيا معاك وما يتقالش عليها إن هي وحشة.
التصميم، الخامات، وتجربة الصوت الموبايل ده بقى لما تيجي تبص عليه وتمسكه هتحس بتناقض غريب. يعني لما تشوف الموبايل ده من بعيد والديزاين واللون الأحمر الخطير والجزء الأسود الشفاف اللي فيه المواسير بتتحرك وحرف الاكس اللي فيه ار جي بي، على فكرة الار جي بي بتاعه شيك جداً وممكن تتحكم فيه، استنوا كده ثواني في ستايلات أصلاً لطريقة الإضاءة وفي بقى ألوان حلوة جداً وروشة يعني ار جي بيهات بجد حلوة. المهم الديزاين تشوفه من بعيد تحفة جداً، تيجي تمسك بقى الموبايل في إيدك، لا بلاستيك في بلاستيك صريح فريم بلاستيك والظهر بلاستيك. هو مش بلاستيك سيء بس هو بلاستيك مش أفخم حاجة طبعاً في الفئة دي، ولا عاذر انفينكس أصل هي لو كانت حاطت فريم معدن وظهر إزاز أو معدن زي النوت 16 والنوت 16 برو كانت هتبوظ كل حاجة عملتها، نظام التبريد بقى اللي هم عاملينه والكلام ده كله كل ده هيروح في الخامات المعدنية أو الخامات الفخمة اللي هم حاطينها. هو مش قوي يعني هو في موبايلات جيمنج وموبايل دولي هقولك عليه في آخر الفيديو جربته كان فريم ومعدن وفيه مروحة تبريد وكان شغال عادي ومش بيسخن قوي، فيعني كنت أحب حتى أشوف فريم معدن يا انفينكس بس ماشي.
ومقاومة الماية برده متواضعة هي طرطشة ماية اي بي 64، فيعني لو أنت نويت تشتري الموبايل ده لازم تكون عارف إن هو شكله روش أوفر وخاماته متواضعة شوية. بصمة الموبايل هنا تحت الشاشة وأدائها كويس جداً، الموبايل فيه مايك إضافي لعزل الدوشة فيه ان اف سي وفيه اي ار وطبعاً صوته استريو مش أعلى حاجة في الدنيا يعني بس خلينا نسمع الصوت... الصوت كويس بس ده مش أعلى صوت خالص في الفئة المتوسطة العليا والصوت مش بلانسد، يعني السبيكر اللي تحت أو السماعة اللي تحت صوتها أعلى بكثير قوي من الصوت اللي بيخرج من فوق، الصوت برده يمشي الدنيا. وفي حاجة بقى استغربتها جداً في الموبايل ده هو سنسور التقارب الخاص بقفل الشاشة على ودنك أثناء المكالمات اللي انفينكس حطاه في كل موبايلاتها، الموبايل ده بقى ما فيهوش السنسور ده مش عارف يعني هل الدنيا ضيقة قوي جوه المضخة واخدة مكان فما عرفناش نحط السنسور! شبكات الاتصال والواي فاي في الموبايل ده أديها تقييم فوق متوسط مش أقوى حاجة يعني، ستيل هواوي، اونر، اوبو، ريلمي وفيفو أقوى منه شوية وهو في مستوى شاومي تقريباً.
الكاميرات والتصوير ونختم بالكاميرات اللي أنا قصدت أخليها في الآخر لأن الموبايل ده موجه للجيمنج بس مش موجه للتصوير، يعني لو أنت عاوز تصور أو بتحب التصوير أكيد مش هتروح تجيب الموبايل ده. المهم إن هو فيه الأساسيات عدسة رئيسية 50 ميجا بكسل فتحة عدسة 1.6 بمثبت بصري وعدسة تانية الترا وايد 8 ميجا بكسل وسيلفي 13 ميجا بكسل، يعني الدنيا على الهادي خالص، تقريباً دي نفس العدسات بتاعة النوت 16 العادي الموبايل ده ما فيهوش عدسة تليفوتو هيخسر قدام أي موبايل فئة متوسطة عليا في العدسة دي، بس هو أقوى منهم في المعالج، حاجة قصاد حاجة وماحدش هياخد كل حاجة يا سلام أنا بقول حكم. المهم إن الموبايل بيصور بورتريه لحد 2 اكس بس 50 ملي بالعدسة الخلفية، وبيصور فيديو بالكاميرا الخلفية لحد 4 كي 60 فريم، والكاميرا السيلفي 4 كي 30 فريم. خلونا نشوف تجربة التصوير بالموبايل ده عاملة إزاي، الصور اللي بتطلع من الموبايل هنا مش قوية ولا سيئة، صور عادية تطلع من أي موبايل متوسط عادي أرخص في السعر كمان. الديناميك رينج مش الأقوى، التلوين مالوش ستايل ثابت، التفاصيل مش بتكون قوية قوي لما تزوم، يعني من الآخر كاميرا أساسية عادية تمشي معاك الدنيا لو عاوز تلقط صورة ولا اتنين مش هتزعل منها وهتاخد منها أداء مقبول. هي الفكرة إنها مش الأقوى تماماً مقارنة مع وحوش الفئة المتوسطة العليا في التصوير، يعني ما تبقاش بتحب التصوير وتروح تجيب الموبايل ده حتى لو عاوز تلعب، ساعتها ممكن تفكر في موبايل متوسط عالي بمعالج متوسط من كوالكوم مثلاً مع سيستم كاميرات قوي، ساعتها الباكدج هيكون موزون بالنسبة لك، فاهمني ولا مش فاهمني أنا بحس أوقات كده إنك بتتوه مني. لو أنت لسه ما تهتش مني قولي رأيك في كاميرات الانفينكس جي تي 50 برو.
وخلونا دلوقتي نشوف تجربة تصوير الفيديوهات بالموبايل. تصوير الفيديوهات في الانفينكس جي تي 50 برو بيصور 4 كي لحد 60 فريم في الثانية، زي ما قلنا الموبايل ده الكاميرات مش بتاعة تصوير قوية، بس المعالج القوي اللي هنا هو اللي وصله لحد 60 فريم وهو المفروض اللي بيعالج بقى الفيديو والديناميك رينج والكلام ده كله. فخلونا نشوف الموبايل ده يعني نافس في الفئة المتوسطة حتى مش المتوسطة العليا في جودة تصوير الفيديوهات ولا إيه الكلام. دلوقتي الجو شمس جداً والدنيا لاسعة في كل حتة فده اختبار حقيقي للديناميك رينج، فالموبايل ده على فكرة أنا شايف الشاشة بشكل معقول دلوقتي، والسيلفي 4 كي بس 30 فريم في الثانية عدسة 13 ميجا بكسل ما تتوقعش منها كتير برده المعالج هيحاول يساعدها علشان تصور فيديو كويس، بس مش عارف بقى الجودة هتكون عاملة إزاي. الزاوية ضيقة علشان تاخد ثبات وخلونا نشوف النتيجة النهائية يعني أنا دلوقتي إيه وكده رايح ناحية الشمس علشان نشوف الحتت اللاسعة والكلام ده كله.
السعر والرأي النهائي السعر الرسمي للنسخة 256 جيجا و12 جيجا رام 30,000 جنيه، 512 جيجا مع 12 جيجا رام 35,000 جنيه ضمان محلي زيرو ضريبة، ينفع تشغل شريحتين اتصال وما ينفعش تشغل كارت ميموري، والموبايل يا جماعة داعم لخاصية الإي سيم (eSIM) عادي جداً. رأيي النهائي: الملعب فاضي للموبايل ده الانفينكس جي تي 50 برو، اختيار مثالي للجيمرز اللي عاوزين موبايل قوي بضمان خايفين من الموبايلات الدولية، هو أصلاً في موبايلات تانية محلية بتقدم معالج قوي وار جي بي وتريجرز وتبريد مائي والكلام ده؟ الإجابة دلوقتي ما فيش حاجة جديدة متاحة، موبايل حلو وهيعجبك لو هتطحنه ألعاب. آه فرق السعر كبير بينه وبين الجي تي 30 برو القديم، لو حابب توفر وتجيب القديم زي ما قلتلك من شوية هاته، هو الفرق الميجور أو القوي ما بينهم هو في وجود نظام التبريد المائي في الموبايل ده بس برده فرق السعر مش قليل. ما تجيبش الجي تي 50 برو لو أنت عاوز موبايل متكامل في الفئة المتوسطة العليا، موبايل يكون ماسك العصاية من النص في كل حاجة لأن الموبايل ده مش بيخاطب الفئة دي وهو بيخاطب الجيمرز بمعالج قوي. والله إنت لو جبت النوت 60 العادي لو أنت استخدامك متوسط يعني هتتبسط وبنص السعر تقريباً.
دلوقتي بقى ركز معايا لو أنت متقبل الموبايلات الدولية وبتدور على موبايل قوي للألعاب، فساعتها ممكن تركن ده وتجيب الاونر وين ار تي اللي سعره بالضريبة دلوقتي تقريباً أغلى 2000 جنيه من الجهاز ده وبمعالج أقوى سناب دراجون 8 ايليت، المعالج ده تقريباً أقوى 30 أو 40% من اللي موجود في الانفينكس جي تي 50 برو، ولكن زي ما أنتوا عارفين هو موبايل صيني دولي مالوش ضمان في مصر. أنا كده عملت اللي عليا قلتلك كل الأوبشنز اللي قدامك، ممكن شاومي تنزل الـ 17 تي قريب بسعر كويس بمعالج قوي برده بس مش عارف تبريده هيكون إيه، الكلام ده كله هيبان مع الوقت. أنا الموبايل ده كويس مش وحش، غالي زي كل الحاجات الجديدة الغالية اللي بتنزل، بس على الأقل الموبايل ده بيقدملك حاجة أحسن من موبايلات جديدة بتنزل بتبقى غالية ومش مقدمة لي حاجة جديدة أكيد أنتوا فاهمين. وبس كده أحب أشكرك جداً لو وصلت معايا النقطة دي، أنا كده خلصت الفيديو، خلصت كل الكلام اللي عندي أكيد تتأكد إنك عملت اللايك الجميل وتكتبلي كومنت حالا وتقولي رأيك في الانفينكس جي تي 50 برو، هل أنت ممكن تفكر تشتريه في يوم من الأيام أو تشتري موبايل جيمنج عموماً ولا إيه الكلام؟ وتأكد إنك عامل لنا سبسكرايب لو بتشوفنا أول مرة على اليوتيوب ومفعل زر الجرس علشان تشوف مراجعات ومقارنات جديدة للموبايلات أول بأول، كان معاكم أحمد سعيد من موقع موبيزل.